Trygd

Trygdin er sett í hásæti í Vága- og Norðoyatunlinum. Málið er, at trygdin í tunlinum er minst líka góð sum á landsvegunum.

Dentur verður lagdur at dagføra trygdina so hvørt, og trygdarútgerðin verður javnan gjøgnumgingin eftir føstum forskriftum. Trygdarútgerðin fylgir norskum reglum um trygd í tunlum.

Fyri at tryggja teg eru:

• neyðpostar við eldsløkkjara og neyðtelefon fyri hvørjar 500 metrar

• harumframt eldsløkkjarar fyri hvørjar 250 metrar

• steðgipláss til bilar fyri hvørjar 500 metrar

• trý vendipláss til størri akfør

• óbrotið FM-radiosamband

• GSM-fartelefonsamband og løgreglussamskifti gjøgnum allan tunnilin

• reyð blunkljós við tunnilsmunnarnar, sum tendra sjálvvirkandi, um ov nógv gass er í tunlinum

• sjálvvirkandi bummur, ið steingir í neyðstøðu

• ljós gjøgnum allan tunnilin

• pumpur, sum flyta lekar burtur

Tá tú kemur til tunnilin

Lurta eftir útvarpsrásini, ið hoyrir til tunnilin (frekvensurin sæst á skelti við tunnilsmunnan)

Tryggja tær, at tú koyrir við í minsta lagi nærljósum. Tak sólbrillurnar av.

Halt frástøðuna til akfarið frammanfyri

Yvirháling / afturumlegging er ikki loyvd í tunlum

Ikki er loyvt at skifta koyrirætning í tunlinum

Ikki steðga akfarinum uttan í neyðstøðu

Tá ið tú stendur í bilarøð í einum tunli

Tendra ávaringarljósini (hasardljósini)

Halt frástøðuna til akfarið frammanfyri, hóast bilrøðin koyrir seint ella er steðgað heilt

Sløkk motorin, um bilrøðin stendur still leingi (1 minutt)

Lurta eftir boðum frá útvarpsrásini í tunlinum

Ger eftir boðunum, ið givin verða

Óhapp

Tendra ávaringarljósini (hasardljósini)

Royn at koyra til eitt neyðsteðgipláss ella í minsta lagi út í síðuna

Sløkk motorin

Far úr akfarinum. Minst til ikki at læsa bilin - lat lykilin standa í

Veit fyrstuhjálp til skaddar persónar

Boða frá óhappinum

Eldur í akfari

Um tú metir, at tú nært at koyra út úr tunlinum, so ger tað

Um hetta ikki er gjørligt, koyr út í síðuna, sløkk motorin og far úr akfarinum beinanvegin. Minst til ikki at læsa bilin – lat lykilin standa í

Royn at sløkkja eldin

Boða frá óhappinum

Veit fyrstuhjálp til skaddar persónar

Skunda tær út úr tunlinum. Mælt verður til at ganga ímóti luftrákinum, hóast hetta kann vera longri vegurin út

Trygd í Eysturoyartunlinum

Serlig trygdarkrøv eru galdandi í Eysturoyartunlinum.

• Tað er ikki loyvt at ganga, renna ella súkkla í Eysturoyartunlinum.

• Tað er ikki loyvt at koyra skutara ella prutl í Eysturoyartunlinum.

• Tað er ikki loyvt at steðga og fara út úr bilinum - uttan í neyðstøðu.

Vakmyndtól skráseta alt, sum hendir í tunlinum.

Alarmsentralurin kann senda boð gjøgnum allar føroyskar útvarpsrásir, tí verður mælt til altíð at hava útvarpstólið tendrað.